Уроки по Joomla 3 можно найти здесь: http://joomla3x.ru/
Пятница, 20 мая 2022 11:55

В.И. Ленин аатынан бүтүн сойуустааҕы пионерия хамсааһына тэриллибитэ 100 сыла

Автор

        Кыһыл хаалтыс оҕо саастаах, ырыа-тойук аргыстаах, кырдьаҕаска-кыаммакка көмөлөһөр аналлаах, аан дойду үрдүнэн баһаам элбэх доҕоттордоох, аһыныгас-аһаҕас сүрэхтээх пионер табаарыс, Пионерия тэриллибитэ 100 сыллаах бэлиэ күнүнэн итии-истиҥ эҕэрдэ!!!

       1922 сыллаахха ыам ыйын 19 күнүгэр комсомол съеһигэр саҥа уураах ылыллан, пионер хамсааһынна тэриллибитэ. Хамсааһын сүрүн сыала-төгүрүччү түмсүүлээх, көмөлөһөргө өрүү бэлэм, истиҥ доҕордуу сыһыаннаах социалистическай уопсастыба оҕолорун иитэн таһаарыы. Ол сыл Саха Сирин хас да улууһугар уонна Чурапчыга пионердар хамсааһыннара тэриллэн үлэ-хамнас саҕаламмыта. Биһиги улууспутугар пионер этэрээтэ 1925 сыллаахха Чурапчы оскуолатыгар тэриллибитэ. Манна бастакы пионердар - Анастасия Иннокентьевна Сивцева, Роман Иннокентьевич Местников, Николай Саввич Соловьев, Семен Семенович Макаров, Николай Семенович Кривошапкин, Петр Васильевич Парфенов. Бастакы пионербаһаатайдартан биирдэстэрэ - Иван Ксенофонтов.
       Бу күн В.И. Ленин аатынан Бүтүн сойуустааҕы пионер хамсааһына тэриллибитэ 100 сылыгар аналлаах дьоро тэрээһин 300-чэкэ улууспут пионер баһаатайдарын, пионердарын, комсомолларын биир түһүлгэҕэ муста. Ол курдук, “Айылгы” НАДь араас кэмнэргэ, улуус оскуолаларыгар таһаарыылаахтык үлэлээбит-хамнаабыт, оҕо иитиитигэр сүрэхтэрин сылааһын, уоттаах төлөнүн анаабыт, көмүс кылааттарын укпут ытыктыыр дьоммут ыалдьыттаатылар.
       Тэрээһин үөрүүлээх аһыллыытыгар С.Д. Флегонтов аатынан Хадаар орто оскуолатын 4 кылааһын үөрэнээччилэрэ Сима Сергеев аатынан пионер хамсааһыныгар киирдилэр, дьон-сэргэ иннигэр кэс тылларын эттилэр. Театральнай туруорууну бэлэмнээтилэр - С.К.Тарасов, Я.В.Климова, “Үөрүү” оҕо сайдар киинин эбии үөрэхтээһин педагогтара, Е.С.Харитонова, Сима Сергеев аатынан музей салайааччыта.
       Бу кэннэ сүрэхтэн сүппэт пионер гимнын, бары кэлбит ыалдьыттар сүһүөхтэригэр туран ыллаатылар.
Чурапчы улууһун баһылыга С.А. Саргыдаев эҕэрдэлээтэ, пионерия хамсааһына оҕо иитиитигэр сүҥкэн кылааты киллэрбитин бэлиэтээтэ, Чурапчы улууһугар пионерия историятыттан доклад аахта, Чурапчы улууһун депутаттарын сүбэ мунньаҕын бэрэссэдээтэлэ А.А. Захаров эҕэрдэ эттэ, улуус дьаһалтатын аатыттан наҕараада туттардылар:Чурапчы улууһа (оройуона) муниципальнай тэриллии баһылыгын, улуустааҕы депутаттар сэбиэттэрин бэрэссэдээтэлин үрүҥ көмүс бэлиэлээх бочуотунай грамотатын Пионердар дьиэлэрин директорынан өр сылларга үлэлээбит М.В Сивцева, Хадаар орто оскуолатын иитэр үлэҕэ директоры солбуйааччы Л.И.Лукина, Чурапчы улууһун үөрэхтээһинин сайдыытыгар өр сыллаах “Үтүө суобастаах үлэтин иһин” бэлиэни Сима Сергеев аатынан Хадаар орто оскуолатын музейын салайааччыта Е.С. Харитонова, улуус үөрэҕириитин систиэмэтигэр өр кэмнээх үтүө суобастаах үлэтин иһин Чурапчы улууһа (оройуона) муниципальнай тэриллии баһылыгын махтал суругун "Үөрүү" оҕо дьоҕурун сайыннарар киин эбии үөрэхтээһин педагога Л.А. Пермякова туттулар.
Чурапчы улууһун үөрэҕин салайааччытын солбуйааччы А.Н. Осипова пионер баһаатайдарга махтал тылын тиэртэ, өр сылларга үрдүк таһаарыылаахтык үлэлээбит пионер баһаатайдар ааттарын ахтан, кинилэр үлэлэринэн киэн туттарын биллэрдэ. Түмүгэр, кинилэргэ наҕараадатын туттарда: өр сыллаах үлэлэрин, үөрэхтээһиҥҥэ тус кылааттарын иһин, Владимир Ильич Ленин аатынан Бүтүн сойуустааҕы пионерскай тэрилтэ 100 сылынан Чурапчы улууҺун үөрэҕин салалтатын бочуотунай грамоталарынан наҕараадаланнылар- Е.М.Калачева, Л.М. Винокурова, В.А.Платонова. Маны таһынан, улуус үөрэҕин салалтатын махтал суруга туттарылынна: Хаяхсыт орто оскуолатын директорыгар Ф.И.Борисовка, Хатылы нэһилиэгин баьылыгар У.Н.Атласоваҕа, педагогическай үлэ бэтэрээнигэр М.Т.Ефимоваҕа, Е.Д.Макаров аатынан Сылан орто оскуолатын кыраайы үөрэтэр музей салайааччытыгар К.Г. Макароваҕа, педагогическай үлэ бэтэрээнигэр С.Е.Кожуровка.
       Үөрүүлээх тэрээһини “Үөрүү” оҕо сайдар киинин “Поющие сердца” куруһуок иитиллээччилэрэ, салайааччы- М.Т. Макарова, Республиктаааҕы “Көтүөххэ үрдүккэ хотойдуу” бырайыак кыттыылаахтара,кыайыылаахтара “Хотой” литературнай бөлөх, салайааччы - А.Н. Кузьмина, “Умсулҕан” үҥкүү ансаамбыла, салайааччы - Сивцева Е.П. киэргэттилэр. Түмүгэр, М.Т. Макарова иитиллээччилэринэн гитаранан доҕуһуоллаан, лааҕыр ырыаларын ыллаан, кэлбит ыалдьыттары урукку кэм долгунугар долгута бигээтэ.
Күндү пионердар, пионер баһаатайдар!!! Эһиги эрчимнээх бэйэҕит, эрэллээх сүрэххит, туохтан да толлубат хорсун санааҕыт, дьоҥҥо доҕордуу сыһыаҥҥыт, көмөҕө кэлэр бэриниилээх бэйэҕит куруук холобур буолар. Баҕарабыт эһиэхэ сүрэххит төлөнө хаһан да умуллубатын, оҕолуу ыраас санааҕыт саппаҕырбатын, олоххут суолун устун барабан, горн тыаһынан доҕуһуоллатан өссө да өр сылларга чэгиэн-чэбдик сылдьын!

Прочитано 156 раз Последнее изменение Четверг, 26 мая 2022 09:29
Решаем вместе
Есть предложения по организации учебного процесса или знаете, как сделать школу лучше?