Уроки по Joomla 3 можно найти здесь: http://joomla3x.ru/
Среда, 29 сентября 2021 17:23

"Чэгиэн кэскил туһугар" кинигэ күн сирин көрдө

Автор

        Балаҕан ыйынааҕы үөрэх үлэһиттэрин сүбэ мунньаҕын чэрчитинэн «Айылгы» НАдь, куйаар ситимин нөҥүө «Чэгиэн кэскил туһугар» диэн саҥа кинигэ сүрэхтэннэ. Кинигэ автора – спорт уонна үөрэҕирии бэтэрээнэ, РФ физкультураҕа уонна спортка туйгуна, СӨ үөрэҕириитин туйгуна Дьяконов Виктор Семенович. Саҥа кинигэ Үөрэх салалтатын салайааччыта Ю.П. Посельскай өйөөһүнүнэн “Сайдам” кинигэ кыһатыгар 280 страницалаах, 300 экземплярынан бэчээттэнэн таҕыста. Кинигэ матырыйаала хомуллуутугар С.В. Тобохов, П.В.Егорова, С.С.Артемьев, М.С. Артемьева, И.П. Лукин күүс - көмө буоллулар.
        Кинигэ ис хоһооно Чурапчы улууһугар араас сылларга үлэлээбит физкультура учууталларын, 50-с сыллартан саҕалаан үлэлээн ааспыт кэрдиис кэмнэрин уонна билигин үлэлии сылдьар кэккэ учууталлары сырдатар. Кинигэ сүрүн чааһа 4 түһүмэххэ арахсар: “Сырдык ааттарыгар сүгүрүйэн” түһүмэххэ - 14 бастакы көлүөнэ идэтийбит физкультура учууталларын туһунан ахтыылар киирдилэр. “Аҕа көлүөнэ алгыһынан” -30 учуутал, “Үйэлээх утум салҕанар”-11 учуутал, “Үөрэх, сайдыы, киэн туттуу” - билиги үлэлии сылдьар учууталлар тустарынан киирдэ.
        Бу «Чурапчы улууһун учууталлара» кинигэ сиэрийэтин бастакы кинигэтэ буолар, салгыы сыллата араас предмет учууталларын ааттарын, үлэлэрин-хамнастарын үйэтитэр кинигэлэр тахсан иһиэхтэрэ диэн эрэнэбит.
        Бу үөрүүлээх тэрээһиҥҥэ Ил тумэн Государственнай мунньах депутата Гуляев М.Д., “Чурапчы улууһа” МТ баһылыгын бэйэни салайыныыга уонна социальнай боппуруостарга солбуйааччы Аммосов Н.И., Үөрэх салалтатын салайааччыта Посельскай Ю.П. эҕэрдэ тыл эттилэр, маны таһынан,биир идэлээхтэрбит, спорт бэтэрээннэрэ, Виктор Семенович үөлээннээхтэрэ, доҕоторо, үөрэппит оҕолоро, уола Николай Викторович Дьяконов бэйэлэрин ахтыыларын, баҕа санааларын,эҕэрдэлэрин тиэртилэр.
        Учууталлар тустарынан кинигэ сиэрийэтигэр бастакы хардыыны оҥорбут кинигэ авторыгар Дьяконов Виктор Семеновичка өр сылларга муспут матырыйаала кинигэ буолан, түмүллэн тахсыбытынан өссө төгүл эҕэрдэбитин, дириҥ махталбытын тиэрдэбит!!!  

Суруйда Иван Лукин

 

Прочитано 180 раз Последнее изменение Среда, 29 сентября 2021 17:33