Уроки по Joomla 3 можно найти здесь: http://joomla3x.ru/
Пятница, 20 ноября 2020 14:14

Үс көлүөнэ салайааччылар

Автор
Сир үүнүүтүнэн, киһи үлэтинэн биллэр. Үлэ киһини киэргэтэр, үрдүккэ кынаттыыр, үтүөҕэ – кэрэҕэ угуйар.
Сэтинньи ый 19 күнүгэр “Айылгы” культура киинигэр Чурапчыбыт улууһугар үөрэхтээһин историятыгар бэйэлэрин суолларын-иистэрин хаалларбыт, тарбахха баттанар  тутаах дьоммут, саргылаах санаалаах, сиэрдээх майгылаах,  сатабыллаах салайааччыларбыт: Саха АССР үтүөлээх учуутала, Чурапчы улууһун Бочуоттаах олохтооҕо, «1941 ̶ 1945 сс. Аҕа дойду Улуу сэриитин кэмигэр килбиэннээх үлэтин иһин», «В.И. Ленин төрөөбүтэ 100 сылынан килбиэннээх үлэтин иһин» мэтээл хаһаайына Николай Иванович Дьячковскай- 90 сааһын, РФ үөрэҕириитин туйгуна, Саха АССР  үтүөлээх учуутала, Саха Республикатын үөрэхтээһинин систематын бочуоттаах ветерана, “СР педагогтарын династията”, “СР физическай культуратын уонна спордун сайдыытыгар  үтүөтүн иһин”, “Чурапчы улууһун үөрэҕин сайдыытыгар үтүөтүн иһин” знактар хаһаайына,  Чурапчы улууһун бочуоттаах олохтооҕо Виталий Михайлович Неустроев- 80 сааһын, РСФСР норуотун үөрэҕириитин туйгуна, Саха Республикатын үтүөлээх учуутала, «СӨ Учууталлар учууталлара», Надежда Константиновна  Крупская аатынан бириэмийэ лауреата, «Азия оҕолоро» норуоттар икки ардыларынааҕы пуонда стипендиата, бэлиэ хаһаайына, Чурапчы уонна Кытаанах нэһилиэгин бочуоттаах олохтооҕо Василий Николаевич Коркин- 70 сааһын бэлиэтиир “Үс көлүөнэ салайааччылар”онлайн дьоро тэрээһин буолан ааста. 
WhatsApp Image 2020 11 19 at 18.42.49
Кыттааччылар, ыалдьыттар бары Ютуб канал уонна ZOOM приложениелар нөҥүө интернет ситиминэн көрдүлэр, иһиттилэр.
Дьоро тэрээһин биир дойдулаахпыт, ытыктыыр салайааччыбыт Россия Федерациятын Сүбэтин  чилиэнэ Борисов Е.А.эҕэрдэ тылынан аһылынна.
 
1232
 
“Үс көлүөнэ салайааччылары барыларын кытары ыкса алтыспыт, тэҥҥэ үлэлэспит салайааччыбыт Гуляев М.Д. Ил Түмэн судаарыстыбаннай мунньаҕын бэрэссэдээтэлэ Гоголев П.В. Саха Сирин үөрэҕин сайдыытыгар кылааттарын иһин махтал суругун үөрүүлээх быһыыга-майгыга туттарда.
“Чурапчы улууһа” МТ  баһылыга Ноговицын А.Т. онлайн эҕэрдэтигэр салайааччыларбыт үлэлээбит, салайбыт кэмнэригэр оҥорон-тутан хаалларбыт үлэлэрин сыаналыырын, талбыт идэлэригэр бэриниилээх дьоһун салайааччылар диэн бэлиэтээтэ, Чурапчы улууһун наҕараадаларын туттарда: “За заслуги перед районом II степени”-Дьячковскай Н.И, “Знак отличия за добросовестный труд” –Неустроев В.М уонна Коркин В.Н.
Улуус депутаттарын мунньаҕын сэбиэтин бэрэссэдээтэлэ Захаров А.А. уонна улуус баһылыгын социальнай боппуруостарга уонна бэйэни салайыныыга солбуйааччы Аммосов Н.И. эҕэрдэ эттилэр, бэлэхтэрин туттардылар. Маны кытары, улуус бэтэрээннэрин сүбэтин бэрэссэдээтэлэ Матвеева М.Н. эҕэрдэтин кытары бэлэхтэрин ыытта.

WhatsApp Image 2020 11 19 at 15.34.37

 
Үөрэх управлениетын начальнига Посельскай Ю.П. сабыс саҥа, аан маҥнайгытын туттарыллар 191 № сэтинньи ый 13 күнүгэр 2020с. бигэргэтиллибит “Почетный работник системы образования Чурапчинского улуса” түөскэ кэтиллэр знагы үс салайааччыга туттарда. Үөрэхтээһин систиэмэтигэр үлэлээн ааспыт салайааччыларбытыгар махтал тылларын анаата, эhиги тэлбит суолгут устун, үөрэх эйгэтэ сайдыы үрдүк кэрдииһигэр тахсарын туһугар үлэлиэм-хамныам диэн эттэ.
“Чурапчы нэһилиэгэ” МТ быһылыга Сивцев В.Д. салайааччылары истин-иһирэх тылынан аҕынна, үөрэхтээһин эйгэтигэр киллэрбит кылааттарын, баай уопуттарын бэлиэтээтэ, сүбэ-ама буолалларыгар махтанна. 
 
Үбүлүөйдээх салайааччыларбыт бииргэ үлэлээбит коллегалара, үөрэнээччилэрэ, доҕотторо эҕэрдэ эгэлгэтин этэн, алтыспыт кэмнэрин ахтан-санаан, күлэн-үөрэн дьоро киэһэ истиҥник ааста. Үөрэх управлениетын араас кэмҥэ салайбыт начальниктар: Егорова Л.Т., РСФСР оскуолаларын үтүөлээх учуутала, Никифоров М.А., РСФСР үөрэҕириитин туйгуна, “Гражданскай килбиэн” бэлиэ хаһаайына, Сидоров Е.С., РФ уопсай үөрэхтээһинин бочуоттаах үлэһитэ, Чичигинаров К.К., РФ уопсай үөрэхтээһинин бочуоттаах үлэһитэ, Тамара Васильевна Павлова, СР үөрэҕириитин үтүөлээх үлэһитэ хас биирдиилэрин бэлиэтээн баҕа санааларын, эҕэрдэлэрин тиэртилэр, үлэ үөһүгэр сылдьан хайдахтаах курдук үлүскэннээх үлэни ыыппыттарын ахтан-санаан аастылар.
 
Юбилярдар харда тылларыгар улэлээбит кэмнэрин, бииргэ үлэлээн ааспыт коллегаларын ахтан-санаан аастылар,  барҕа махтал тылларын анаатылар, эдэрдэргэ кэс тылларын тиэртилэр. 
Үөрүүлээх тэрээһини Дмитрий Петрович Коркин аатынан Чурапчытааҕы республиканскай орто олимпийскай эрэллэри бэлэмниир оскуола-интэринээт директора Николай Николаевич Гуляев “Учуутал доҕорбор” диэн ырыанан үрдүк нотаҕа түмүктээтэ.
Прочитано 438 раз Последнее изменение Вторник, 24 ноября 2020 16:56