Алтынньы 5 күнүгэр Одьулуун орто оскуолата 🌿80 сыллаах үбүлүөйүн бэлиэтээтэ. Бу күн Саһыл Уйалаах алааһыгар маҥнайгы оскуола олохтоммутун кэрэһэлиир мэҥэ Таас аһыллыыта буолла. Сарсыардаттан ыалдьыттарбыт, выпускниктарбыт, араас кэмҥэ үлэлээбит дириэктэрдэр, учууталлар, үлэһиттэр тоҕуоруһа муһуннулар. Үбүлүөйдээх тэрээһини үөрүүлээхтик арыйыы алгыһа этилиннэ. Илии илииттэн ылсыһан оһуохайы эҥэриттэн тартыбыт. Үбүлүөйдээх былаахпыт үөһээ күөрэйдэ. Былааҕы таһаардылар:Михайлов Герман 11 кл., Седалищев Сеня 9 кл., Алексеев Айсен 4 кл. Ол кэннэ выпускниктар «Оскуолаттан кынат анньынан»кылаас чаастарыгар ыалдьыттаатылар. Бары биир тэҥ формаланан, атрибуттанан бэлэмнэнэн кэлбиттэр. Кылаас чаастарыгар выпускниктарбыт мастер класс, ахтыы, альбом, ырыалары, араас оонньуулары, умнуллубат түгэннэри үөрэнээччилэргэ бэлэхтээтилэр. Бу бириэмэҕэ үлэлээн ааспыт дириэктэрдэргэ, учууталларга, үлэһиттэргэ «Үлэлээн ааспыт кэмнэрим...» төгүрүк остуол ыытылынна. Үбүлүөй үөрүүлээх чааһыгар выпускниктар учуутал күнүнэн, үбүлүөйүнэн үөрэппит учууталларын ис сүрэхтэриттэн долгуйан туран эҕэрдэлээтилэр. Элбэх сылаас, истиҥ тыллар этилиннилэр. Үбүлүөйбүт түмүгэр, бука бары ыалдьыттарбытын минньигэс астаах фуршетка ыҥырдыбыт. Бары үөрэн-көтөн, үҥкүүлээн, эҕэрдэ тыллары этэн, оскуолабыт үүнэ-сайда, үрдүккэ дабайарыгар алгыс тыллар ананнылар. Кэлэн күндү ыалдьыт буолбуккутугар барҕа МАХТАЛ